UNESCO-nun himayəsi ilə Qlobal Media və İnformasiya Savadlılığı Həftəsi keçirilir

Link: https://azertag.az/

Oktyabrın 24-də UNESCO-nun himayəsi ilə bütün dünyada Qlobal Media və İnformasiya Savadlılığı Həftəsi başlayıb. Ənənəvi tədbirlərin builki mövzusu “İnformasiyanın yeni rəqəmsal sərhədləri: İctimai məlumat üçün media və informasiya savadlılığı”dır.

AZƏRTAC təşkilatın rəsmi saytına istinadla xəbər verir ki, bir həftə ərzində keçiriləcək tədbirlərdə həm imkanlar və risklər vurğulanacaq, həm də generativ süni intellekt və rəqəmsal məzmun yaradıcılarının qabaqcıl texnologiyalardan istifadə etməklə cəmiyyətin xeyrinə məlumat istehsalı və yayılmasına transformativ təsirinə diqqət yetiriləcək.

Həftə oktyabrın 30-31-də Əmmanda UNESCO və İordaniya Haşimilər Krallığının təşkil edəcəyi qlobal konfransla yekunlaşacaq. Konfrans iştirakçılara maraqlı və dərin müzakirələr aparmaq, ekspertlərin fikirlərini dinləmək, media və informasiya savadlılığı sahəsində əməkdaşlığı gücləndirmək üçün innovativ yolları araşdırmaq imkanı verəcək.

Qlobal Media və İnformasiya Savadlılığı Həftəsi dünyanın hər yerindən maraqlı tərəfləri öz tədbirlərini və fəaliyyətlərini təşkil etməyə təşviq edən beynəlxalq hərəkatdır. İstər yerli seminarlar, istər milli maarifləndirmə kampaniyaları, istərsə də onlayn vebinarlar vasitəsilə hər kəs bu qlobal təşəbbüsdə iştirak etməyə dəvət olunur.