Azərbaycanın UNESCO İcraiyyə Şurasının sessiyasında təqdim etdiyi qərar layihəsi yekdilliklə qəbul olunub

Link: https://azertag.az/

UNESCO-nun İcraiyyə Şurasının 215-ci sessiyasında Azərbaycan yeni uğura imza atıb. Ölkəmizin təklifləri yekdilliklə qəbul olunub.

AZƏRTAC xəbər verir ki, Azərbaycanın UNESCO-nun 215-ci sessiyasının gündəliyinə təklif etdiyi "Fit For Life” təşəbbüsünün həyata keçirilməsi və Fiziki Təhsil və İdman üzrə Nazirlərin və Yüksək Səviyyəli Şəxslərin 7-ci Beynəlxalq Konfransı (MINEPS VII)" başlıqlı qərar layihəsi yekdilliklə qəbul edilib.

Azərbaycanın UNESCO yanında daimi nümayəndəsi Elman Abdullayev 61 ölkənin sponsorluğu ilə Azərbaycan tərəfindən təqdim olunan qərar layihəsi haqqında danışaraq, 2023-cü ilin martında Bakının Fiziki Təhsil və İdman üzrə Nazirlərin və Yüksək Səviyyəli Şəxslərin 7-ci Beynəlxalq Konfransına ev sahibliyi edəcəyini xatırladıb. Bildirib ki, Azərbaycan UNESCO-nun "Fit For Life" təşəbbüsünü dəstəkləyən ilk ölkələrdəndir.

Qərar layihəsinin əsas məqsədi dünyada gənclərin rifahını artırmaq üçün inklüziv və inteqrasiya edilmiş yol xəritəsi hazırlamaq, idmanda səfərbərliyi gücləndirməkdir.

Şəhla Ağalarova
AZƏRTAC-ın xüsusi müxbiri
Paris