Koişiro Matsuura: Ümummilli lider Heydər Əliyev Azərbaycan dövləti və xalqı qarşısında əvəzedilməz xidmətlər göstərib
2018-05-09
Ümummilli lider Heydər Əliyev Azərbaycan dövləti və xalqı qarşısında əvəzedilməz xidmətlər göstərib.
Bu sözləri UNESCO-nun sabiq baş direktoru Koişiro Matsuura AZƏRTAC-ın Yaponiyadakı xüsusi müxbirinə müsahibəsində deyib.
Ulu öndər Heydər Əliyevin onun xatirələrində çox güclü şəxsiyyət və görkəmli dövlət xadimi kimi qaldığını vurğulayan K.Matsuura bildirib ki, ilk dəfə Azərbaycana 2000-ci ilin aprelində Prezident Heydər Əliyevin dəvəti ilə gedib. Həmin vaxt Bakıda türkdilli ölkələrin dövlət başçılarının “Kitabi-Dədə Qorqud” dastanının 1300 illik yubileyinə həsr edilmiş zirvə görüşünə qatıldığını xatırladan sabiq baş direktor tədbirin onda böyük təəssürat doğurduğunu vurğulayıb.
K.Matsuura qeyd edib ki, Heydər Əliyevin onu Bakıya sadəcə sammitdə iştirak etmək üçün deyil, eyni zamanda, Azərbaycanı daha yaxından tanımaq, dostluq əlaqələrini gücləndirmək üçün dəvət etdiyini çox yaxşı başa düşürdü. Türk dilini bilmədiyim üçün Heydər Əliyev mənə xüsusi diqqətlə yanaşır, mühüm qonaq kimi mənə çox böyük hörmət göstərirdi. Sammitdən sonra Heydər Əliyevin evində birgə şam etdik. Həmin gün İlham Əliyev və Mehriban xanım Əliyeva ilə şəxsən tanış oldum. O zaman Heydər Əliyev 77 yaşında olmasına baxmayaraq, çox güclü və sağlam görünürdü. Bu görüşdən sonra həmişə onu və ailəsini çox xoş hisslərlə xatırlayıram.
İlk səfərdən sonra Azərbaycan ilə əməkdaşlıq əlaqələrinin inkişafından məmnunluqla danışan UNESCO-nun sabiq baş direktoru bildirib ki, məhz ümummilli lider Heydər Əliyevin böyük əməyi sayəsində bu münasibətlər möhkəm təməl üzərində quruldu. Azərbaycanın Birinci vitse-prezidenti və Heydər Əliyev Fondunun prezidenti Mehriban xanım Əliyevanın çoxşaxəli fəaliyyəti nəticəsində bu əlaqələr daha da möhkəmlənib.
SSRİ dağıldıqdan sonra regionda çox gərgin geopolitik vəziyyətin yarandığına diqqət çəkən K.Matsuura deyib ki, Azərbaycan da bu ittifaqdan çıxmış digər ölkələr kimi müstəqilliyini qorumağa çalışırdı. İqtisadi xaosun hökm sürdüyü, ərazisinin bir hissəsi işğal olunan bir ölkəni idarə etmək çox çətin idi. Amma Heydər Əliyev çox bacarıqlı dövlət başçısı olduğunu bütün dünyaya göstərdi. O, nəinki işğalın qarşısını aldı, həm də ölkəni ağır iqtisadi durumdan çıxarmağa nail oldu. Fikrimcə, bunun kökündə Heydər Əliyevin dövlət başçısı kimi müdrikliyi və qəbul etdiyi qərarların uzaqgörənliyi dayanırdı. Heydər Əliyev müharibə vəziyyətində olan dövləti idarə etməsinə baxmayaraq, digər ölkələrə də diqqət yetirir, qarşılıqlı əlaqələrin inkişafı üçün uğurlu addımlar atırdı.
K.Matsuura məhz bu dahi siyasətçinin gərgin əməyi sayəsində ölkəmizin yenidən müstəqil dövlət kimi formalaşdığını və onun müəyyən etdiyi strategiya nəticəsində bugünkü səviyyəyə çatdığını diqqətə çatdırıb.
Həm UNESCO-nun baş direktoru işlədiyi dövrdə, həm də sonrakı illərdə Yaponiya ilə Azərbaycan arasında əlaqələrin inkişafına çalışdığını bildirən K.Matsuura bu gün də iki ölkə arasında dostluq münasibətlərinin inkişafına şəxsi töhfəsini verməyə hazır olduğunu bildirib. Keçən dövrdə Yaponiya ilə Azərbaycan arasında münasibətlərin müsbət istiqamətdə inkişafından məmnunluğunu ifadə edən K.Matsuura həmin əlaqələrin bundan sonra da sürətlə inkişaf edəcəyinə əminliyini bildirib.
Müasir mərhələdə Azərbaycan-Yaponiya münasibətlərinin sürətlə inkişaf etdiyini qeyd edən K.Matsuura bu əlaqələrin hər iki xalqın inkişafına böyük töhfələr verəcəyinə əmin olduğunu bildirib. Azərbaycanın karbohidrogen ehtiyatlarından çox səmərəli istifadə etdiyinə diqqət çəkən sabiq baş direktor əldə edilən kapitalın həm infrastrukturun inkişafına, həm də insanların rifah halının yaxşılaşmasına yönəldilməsini müsbət qiymətləndirib.
Azərbaycan xalqına ölkəmizdə aparılan nəhəng quruculuq işlərində uğurlar arzulayan K.Matsuura oktyabrda Bakıda keçiriləcək növbəti Beynəlxalq Humanitar Forumda məmnuniyyətlə iştirak edəcəyini də vurğulayıb. O, əminliklə bildirib ki, Heydər Əliyevin müəllifi olduğu inkişaf yolunda Prezident İlham Əliyev də həmişə uğurla addımlayacaq.
